Psa 116 | YON | STEP | Nembed Yariman yaa mimyob dowaken keenaan, amborom kuu ne wengiib awawe ande baandiyiib kuu wengamboroon kowe.

Psalms 116

Yook 116

1 NembedYariman yaa mimyob dowaken keenaan,
amborom kuu ne wengiib awawe ande baandiyiib kuu wengamboroon kowe.
2 Yembed ye kerendem kuu ne yaa wengambarande kowimaan kowe,
ne wad kee doriin yaron kuu ye yaa baandimamaniin.
3 Bobni ye kibin abakbed ne kuu yerengkoon,
kwane bobkonombon yiri kubuni ye uniwon karakwon kuu ne yaa meneboon,
kowe ne kuu miin yiminban kereni mimyob darewoob wandaan.
4 Kwamune kerekori,Yariman yaningko yaa kowe baandaan,
“OYariman, ne kuu kuyaa burudande nende!” andaan.
5 Yariman kuu kabamoon kondoon ye mimyob dowaken keendi ye God,
ye kuu yorokmo dobiri ye God,
nub God kuu mimyob keendimaan.
6 Yarimanbed mengmengiibban iwari doriibdan yaa kuu awande dorondarimaan,
ne kuu dababbed kankubune yirimo keroon kuu yembed ne nen angka kowoon.
7 O ne kingkin, meeni darewoob keroon kuu koronde iwari kerok,
amborom kuuYarimanbed amun kamewoon kowe.
8 OYariman, ebbed ne kuu bobni yaa burudande nendewen,
kwane ne kuu ongmeewe ne inok wi kuu dowan keroon,
kwane ne kuu awaweewe komborok andindo.
9 Ne kuu wad dobiridan yi ambibkin aom doriin kuu
Yariman ye arinambo ari amunmo dobiri ye kiwaan ari dodkanmo yarebaniin.
10 Nembed anam ande yedmaan kuu
“Ne kuu dabab darewoowiib kii.” andaan.
11 Ne kuu binangke uniyiib keraan kumbed yedmaan,
“Karub korem kuu dudanabidanmo kii.” andaan.
12 Yarimanbed ne yaa amun amun kamembirimaan kuyaa kuu
nembed komo inande konaniin?
13 Ne kuuYarimanbed arewa yaa burudande nendoon kuyaa eso andi dowad wain ok ye kabus nande ye yaa kankooneni,
ye aningko kowe ye yaa baandaniin.
14 Kwane, ne kuuYariman ye dowad kwananiin andi ye weng yedme nongkobaan kuu awinaniin,
ye nimakarub yi arinambo arimbed kwamunemo awinaniin kui.
15 Yariman ye karadmodan ye indob arimbed kuu miin manimanandeb anam,
kowe yi dukni kuu barang miin darewoob ande meenoon.
16 OYariman, anam kuu ne kuu eb dememan.
Ne kuu eb dememan, eb deme wonong yu mingki kui.
Ne kuu yerengkiwen kuu ebbed dudbere nen obon keruwewen.
17 Ne kuu eso andi dowad munob kabdi yeman kuu kabdeni
ewaningko kowe eb yaa baandaniin.
18 Kwane, ne kuuYariman ye dowad kwananiin andi ye weng yedme nongkobaan kuu awinaniin,
ye nimakarub yi arinambo arimbed kwamunemo awinaniin kui.
19 Yariman ye kurikuri boyambib yu kuuk wirinimbon aombed kwananiin,
o Yerusalem, kub kidangkambon aombed kui.
Yariman ye aningko kankoonime.